1483 г. июня 11. — Правая грамота псковского князя Ярослава Васильевича и псковских посадников Снетогорскому монастырю на шестую часть реки Перервы, спорную с Козмодемьянским монастырем
Список XVI в.; перед текстом: Снимокъ с правои грамотЪ псковского князя Ярослава Васильевича Оболенского с Снетогорскимъ монастыремъ о шестои доли водЪ, што имъ дано на проЪздъ; после текста: А печати у правои грамоты: княжъ Ярослава Васильевича, а другая посадниковъ псковскихъ. ГПБ, собр. Погодина, № 1912, лл. 133 об.—136 об.
АЮ, № 2.
Передъ господиномъ псковскимъ Ярославомъ Васильевичемъ, и передъ посадники степенными, передъ Левонтиемъ Тимофеевiчемъ, и передъ Степаномъ Максимовiчемъ, и передъ соцкими на сЪнехъ, стоя на судЪ, игуменъ Тарасеи Богородицкои Снетные горы i всЪ старцы Снетогорские сь Юрьемъ соцкимъ, с старостою сь Егорьевскимъ, да с Ортемомъ и с Ыльею, со всЪми ихъ сябры, и с ыгуменомъ с Лаврентиемъ Кузмодемьянскимъ з Гремячие горы и со всеми старцы Кузмодемьянскими, а ркучи тако игуменъ Тарасеи i всЪ старцы Снетогорские: господинъ князь, i посадники, i соцкие; тому, господине, Юрью сотцкому, старосте Егорьевскому, i Ортему, и Ильи, i всЪмъ ихъ сябромъ, игумену Лаврентию Кузмодемьянскому i всЪмъ старцомъ Кузмодемьянскимъ пять чястеи в Перерве реки, а намъ, господине, шестая часть в Перерве реки, проезду деля; и нынечя, господине, Юрьи, и Ортемъ, и Илья, i всЪ сябры ихъ, игуменъ Лаврентеи и старцы Кузмодемьянские насъ шестои части в Перерве реки лишаютъ, а проЪзду намъ не дадутъ; а у насъ, господине, в тои Перерве реки на шестую часть грамоты купчие. Да и положили грамоты купчие [327] передъ осподою. I осподiнъ князь псковскои Ярославъ Васильевичъ, и посадники, и сотцкие въспросили Юрья, и Ортема, и Илью, i всЪхъ сябровъ ихъ, игумена Лаврентия i всЪхъ старцовъ Кузмодемьянскихъ: отвечаите, почему вы игумена Тарасья и старцовъ Снетогорскихъ в Перерве реки лишаете шестои доли, а проезда имъ не дадите. И Юрьи, да Артемъ, да Илья, i всЪ сябры ихъ, игуменъ Лаврентеи и старцы Кузмодемьянские, тако ркли: то, господине, у насъ не Перерва река, а в тои реки у насъ вода копаная, а вся вода наша; а игумену Тарасью и старцомъ Снетогорскимъ в тои воде у насъ шестое части нЪть, и мы имъ потому и проЪзда не дадимъ. Да положили и свои грамоты передъ осподою. И господинъ князь псковскои Ярославъ Васильевичь, и посадники, i сотцкие, прочетъ передъ собою обои грамоты, и дали грамоты Климяты сотцкому, да послали княжого боярина Михаила Чета да и Климету Семеновiча сотцкого тое воды в Перерве рекЪ досмотрЪти. И княжои бояринъ Михаило да Климета сотцкои тое воды досмотрЪли, да и на лубъ выписали, i передъ осподою положыли, да и велись по лубу. И князь псковскои Ярославъ Ваеильевичъ, и посадники степенные, и сотцкие вспросили обоихъ с обою сторонъ: снимаете ль с межниковъ межничьства. I обои исцы тако ркли: снимаем, господине. И господинъ князь, i посадники, i сотцкие вспросили iгумена Тарасья и старцовъ Снетогорскихъ: есть ли у васъ стариковъ хто, кому то ведомо, что вамъ в Перерве рекЪ шестая часть, проЪзда деля. И игуменъ Тарасеи и старцы Снетогорские воименовали старика Терентия Кудатова: тому вЪдомо, что намъ шестая часть есть, проЪзду деля, в Перерве реки; на того и послалися. А Юрьи, да Ортемъ, да Илья, i всЪ сябры ихъ, и игуменъ Лаврентеи и старцы Кузмодемьянские того же старика воименовали Терентия Кудатова. И послались обои [ис]цы на одного старика. И господинъ князь псковскои, i посадники, и сотцкие велели передъ собою поставити Терентея Кудатова. И Терентеи, ставъ передъ осподою, тако рекъ: в тои, господине, Перерви реки Юрью, и Ортему, да Ильи, i всЪмъ сябромъ ихъ, и игумену Лаврентию Кузмодемьянскому i старцомъ пять частеи; а игумену Тарасью Богородiцкому и старцомъ Снетогорскимъ в Перерве реки шестая часть, проЪзда деля; то мнЪ, господине, вЪдомо. I по тому князь псковскои Ярославъ Васильевичъ, i посадники степенные Левонтеи Тимофеевичъ и Степанъ Максимовичь, и сотцкие игумена Тарасья Богородiцкого i всЪхъ старцовъ Снетогорскихъ в шестои части в Перерве реки у проезду оправихомъ; а Юрья сотцкого, старосту егорьевского, и Ортема, да Илью, i всЪхъ сябровъ, игумена Лаврентия и старцовъ Кузмодемьянскихъ з Гремячеи горы повiнихомъ; и дахомъ игумену Тарасию Богородiцкому i всЪмъ старцомъ Снетные горы грамоту правую, по псковскои пошлины, в Перерве реки на шестую часть на проЪздъ. Да и послалъ господинъ князь псковскои Ярославъ Васильевичъ, и посадники степенные, и сотцкие княжого боярина Михаила Чета да [328] Клименту сотцкого, с Терентиемъ старикомъ, в Перерве реки шестои чясти выделити на проЪздъ iгумену Тарасью и старцомъ Снетогорскимъ. И того старикъ Терентеи, со княжимъ бояриномъ и сотцкимъ, в Перерве реки отделили от Рожитецькои стороны игумену Тарасью и старцомъ Снетогорскимъ шестая чясть на проЪздъ. А потомъ о томъ тяжи не быти. А грамоту правую писалъ княжь Ярославъ Васильевича дiякъ Iвашко Микитинъ в лЪте 6991 месяца июня в 11 день.